ភ្នំពេញ៖ ទីភ្នាក់ងារសហរដ្ឋអាមេរិកដើម្បីការអភិវឌ្ឍន៍អន្តរជាតិ ហៅកាត់ USAID និងសាកលវិទ្យាល័យកាលីហ្វ័រញ៉ានៅប៊ឺកលី បានប្រកាសអនុវត្តជាផ្លូវការនូវគម្រោងអភិវឌ្ឍន៍ជំនាញការងារឌីជីថលដែលមានមូលនិធិ ១៥លានដុល្លារអាមេរិក។

គម្រោងនេះត្រូវបានដាក់ឱ្យអនុវត្តនៅថ្ងៃទី២៣ ខែកុម្ភៈ ឆ្នាំ២០២២ ក្រោមវត្តមានឯកអគ្គរដ្ឋទូតសហរដ្ឋអាមេរិកលោក W. Patrick Murphy និងលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងគោលបំណងផ្តល់ឱ្យយុវជនកម្ពុជា នូវជំនាញក្នុងការប្រកួតប្រជែងលើវិស័យសេដ្ឋកិច្ចឌីជីថល។

លោកឯកអគ្គរដ្ឋទូតលើកឡើងថា សាកលវិទ្យាល័យកាលីហ្វ័រញ៉ានៅទីក្រុងប៊ឺកលីនឹងអនុវត្តគម្រោងអភិវឌ្ឍន៍ជំនាញការងារឌីជីថលរយៈពេល ៥ឆ្នាំរួមជាមួយនឹងស្ថាប័នដៃគូកម្ពុជាជាច្រើន។ លោកបន្តថា គម្រោងនេះនឹងពង្រឹងជំនាញឌីជីថលរបស់យុវជន និងអ្នកជំនាញរបស់កម្ពុជាអាចពង្រឹងសមត្ថភាពប្រកួតប្រជែងរបស់ខ្លួននៅក្នុងសេដ្ឋកិច្ចពិភពលោកដែលពឹងផ្អែកលើបច្ចេកវិទ្យាកាន់តែខ្លាំង និងត្រូវការជំនាញការងារឌីជីថល។

គម្រោងថ្មីនេះនឹងធ្វើការជាមួយគ្រឹះស្ថានឧត្តមសិក្សានៅកម្ពុជា ដើម្បីពង្រឹងវគ្គសិក្សានិងកម្មវិធីនានាសម្រាប់និស្សិតក្នុងវិស័យបច្ចេកវិទ្យាព័ត៌មាននិងសារគមនាគមន៍។ គម្រោងនេះនឹងតភ្ជាប់វិស័យឯកជនរបស់កម្ពុជា និងសាកលវិទ្យាល័យក្នុងស្រុកជាច្រើន ដោយបង្កើតឱកាសការងារ តាមរយៈការចុះកម្មសិក្សាក្នុងកិច្ចសហការជាមួយវិស័យឯកជន ព្រមទាំងអាចផ្តល់អាទិភាពខ្ពស់លើបរិយាប័ន្ន ដើម្បីធានាថាយុវជនមកពីគ្រប់មជ្ឈដ្ឋាន អាចទទួលបានឱកាសដែលគម្រោងនេះនឹងផ្តល់ឱ្យ។

សូមបញ្ជាក់ថា សាកលវិទ្យាល័យកាលីហ្វ័រញ៉ាប៊ឺកលី គឺជាសាកលវិទ្យាល័យស្រាវជ្រាវដ៏ល្បីមួយនៅលើពិភពលោក ដែលមានមហាវិទ្យាល័យ និងសាលារៀនចំនួន១៤។ អតីតនិស្សិតនៃសាកលវិទ្យាល័យនេះ ត្រូវបានទទួលស្គាល់លើជំនាញសហគ្រិនភាពរបស់ពួកគេដោយបានបង្កើតក្រុមហ៊ុនល្បីៗជាច្រើនដូចជា Apple, Tesla, Intel, eBay, SoftBank, AIG និង Morgan Stanley៕